Ja爺: 7月 2009

2009年7月29日星期三

爸爸媽媽話我可以曳呀!

我出咗院兩個星期, 無事啦!

繼續食, 繼續玩, 繼續曳, 繼續跟爸爸媽媽去街街

上星期六本來可以跟大佬佢地去游水,

但係我星期五又唔小心整親心口,

肌肉痛痛, 所有節目取消, 又要休養.

到星期日又離奇地好番喎! 爸爸媽媽因為咁,

所以佢地話, 只要我活活潑潑, 生生猛猛,

我鍾意點曳就點曳

媽媽仲應承我只要天氣好, 塊地唔濕,

佢晚晚都會帶我落街街行.

(聽住先啦)

2009年7月15日星期三

JaJa 出院啦!

JaJa今朝因為無poopoo, 所以都係要照X光. 不過佢好好胃口, 姑娘都話佢唔似有事, 似呃飲呃食囉! 下午照完, comes out 無野, 只有少少poopoo積存, 最後結論應該係佢有菌, 所以又疴又嘔. 相信佢尋日入院前嗰一篤噴射poopoo係關鍵, 乜都噴晒出黎, 家陣好番啦!

可憐佢吊咗一晚鹽水, 個身好似有d水腫咁, 我地接佢走, 佢都仲未poo, 我地諗佢一定係要見到我地先poo, 因為平時佢大部份時間都係有我地響樹先poo,博有獎嘛! 果然不出所料, 返屋企途中見佢震震吓, 係有d野咁, 我地停車比佢出街行吓, 好快, 疴咗兩大篤poo, OK啦! 唔叫好靚但一條條囉! 返到屋企仲黎多一篤, 加埋vv, 媽媽惡夢又開始啦! 佢家陣個狀態, 完全同佢前兩日個謝樣係極端呀!

要食藥架! 有抗生素同埋乳酸菌, 不過如果佢聽日無乜事, 我地都唔會比佢再食, 食得多哩d野都唔係太好呀!

JaJa你無事就好啦! 知唔知爸爸幾咁擔心你, 瞓都瞓得唔好呀! 雖然你咁樣攪一攪, 媽媽就無咗一張日本機票, 不過無所謂, 最緊要你好番, 照常咁為食咁活潑就得啦! 仲有要多謝大家關心呀!

2009年7月14日星期二

JaJa 入咗醫院

今朝 JaJa 唔肯食野, 只係肯飲水, 葡萄糖水同埋開到糊仔咁稀o既糧. 之後下晝突然疴一大篤水, 好大劑, 即刻要去Dr.Chan駐診o既CAU呀!

先黎個驗血, 好彩一切正常, 器官無問題. 跟住要照X光, 但係要等到夜晚先照呀! Dr.Chan要JaJa吊鹽水同埋留院兩晚呀!

睇吓JaJa幾咁無心機. 佢一見到我地, 好想出黎又好想我地抱, 真係陰公呀!

姑娘話佢黃昏肯食野, 食咗1/4罐糧. 我地走都好唔捨得佢呀! 要佢一個響籠入面, 無我地, 無野食, 無電視睇, 無得玩, 一定好唔慣呀! 不過咁好過返屋企有乜事又要再去醫院呀!

都唔知佢係乜事, 要等埋今晚X光先知乜事. 希望佢真係食錯/lam錯野啦! JaJa加油, 我地聽日會探你, 後日接你出院, 小朋友要病吓先會大, 無事o既!

三支針的七月十四

JaJa尋日去完玩玩, 仲去咗沖個靚涼, 爽晒! 不過......

今朝嘔嘔響床床樹, 因為JaJa有前科, 試過食得太多會嘔, 而佢又食早餐喎, 所以爸爸媽媽都無太為意返咗工. 媽媽放工返屋企, 弊! 點解嘔咗兩撻響走廊, 仲無晒精神, 媽媽拖地, 入廚房整野食, 連最鍾意o既零食都無理過, 大件事啦! 之後佢又嘔咗一次, 咁爸爸即刻打電話搵醫生, 準備出去睇. Dr. Chan 響電話教如果係嘔食物, 可以比葡萄糖水佢飲, 睇吓佢仲會唔會嘔. 當然即時落街買啦! 飲完葡萄糖水隔咗一陣, 又嘔呀! 佢嘔到可能覺得自己污漕, 唔伸脷鍚我地呀! 成晚瞓響樹, 乜都無心機呀! 好彩poopoo係正常咋! 唯有再搵 Dr. Chan, 但佢響CAU做緊野, 要十二點幾先返到診所. 無問題, 你肯睇, 我地幾夜都去. 等去醫生o既兩個鐘, 好彩無再嘔, 但係剩係瞓囉!

半夜去到診所, Dr. Chan話佢應該食錯野, 即時同佢打咗三支針, 一支係水, 維持佢未來12小時體內水份, 一支係抗生素, 仲有一支係止嘔針. 支水好大支架! 好似卡通片見到好粗好大支, 不過打入去佢會涼涼地會舒服D. Dr. Chan話要睇埋佢第二日係點, 今晚無得食野. 如果第日有再嘔, 就要照X光呀!

JaJa尋日走過草地, 唔知有冇食草. 食過蛋糕, 不過應該唔關事. 踩過屎, 唔知有冇lam入口. 仲有去沖涼, 唔知有冇飲唔乾淨o既水. 同埋爸爸餵過蝦比佢食, 唔知關唔關事. 總知好多野啦! 見到佢個樣好可憐呀! 好彩佢睇醫生時已經精神番少少, 睇完返屋企仲想食野跳跳吓. Dr.Chan話佢咁活躍,, 有樣好處係佢一有事好易察覺到, 如果係好文靜o既狗, 真係未必知有事架! 多謝佢咁安慰我呀!