閉關記事

Sep 27

為求穩陣, JaJa手術前又驗血呀! 今次非常正常, 個report仲正過7月嗰份. 除咗desex, 仲 mok 埋兩隻尖牙, 嘩! 牙根仲長過隻牙, 唔怪之得甩唔到啦! 大夫話佢兩隻蛋蛋一整就出, 所以傷口好細呀! 做完手術佢成面濕晒, 因為插喉留口水呀! 留到成面同下巴都係. 回家途中佢迷迷地, 好彩肯入袋返上樓呀! 可能嗰時藥力未過, 佢仲坐得瞓得吓! 夜咗藥成一過, 佢一郁就痛到大叫, 死都唔肯坐同訓呀! 當然無可能抱到佢啦! 好彩佢又有胃口喎! 只係唔敢比太多佢攪到佢唔夠喉咁! 仲識得去vv, vv時都無痛. 半夜佢企足成半個鐘先行一步, 好辛苦先上到床訓. 5點幾佢呼吸好急, 嚇死我呀! 好彩第日問大夫佢話因為插過喉, 所以氣管唔會太好, 有時呼吸急係正常.

Sep 28

今朝早餐正常, 佢食得好開心. 仲 poo poo埋, 好正常呀! 佢有時仲會痛到大叫. 不過情況好好多. 因為我看住佢, 所以無戴喇叭, 佢都好乖乖無攪個傷口. 成日訓吓醒吓, 可能無咁痛, 仲想跳上梳化, 當然唔成功啦!訓咗成個下晝, 成個醒晒! 夜晚分咗兩餐比佢食, 不知幾高興. 仲跑黎跑去, 追波波, 當然輕易跳上梳化啦! 佢開始想攪個傷口, 即時要戴喇叭. 戴咗之後又謝番! 無辦法啦!

Sep 29

今日簡直係同以前無分別啦! 非常活潑, 極之頑皮. 唔知係食藥定係乜野關係, 佢無時無刻好似好肚餓咁! 我烚咗半隻雞胸肉撕開比佢食, 佢食極唔夠咁! 成日扭要食野. 當然無可能一定過比佢食晒啦! 唯有唔理佢囉! 一唔理佢就扮down扮無mood囉! 今日仲可以抱到佢, 佢唔知係咪兩日無抱過佢, 佢挨到實一實, 仲猛咁鍚我tim! 今日仲帶咗佢落街買野, 不過只係響袋無比佢落地, 佢都好開心吖! 聽日輪到爸爸當更, JaJa一定好開心, 佢最鍾意跟住爸爸吖!

Sep 30

因為爸爸話要同D朋友去大球場做乜鬼"最强之第十二人", 下晝同我玩玩吓就"閃"鬼咗出街, 留低我一個喺屋企賞雨......哎....等呢條茂利陪我, 真係自己返房"交交豬"好過!.....爸爸真係一個唔合格嘅看更, 等媽媽放工返嚟, 一於篤條茂利背脊先!

Oct 1

今日國慶, 梗係要出街街啦!  我地一家三口港九新界一日遊, 先去沙田宜家睇吓傢俬,

再兜去中大附近海傍行吓跑吓, 再去西貢飲個tea, 仲去埋Petmax行街街先返屋企. 雖然JaJa要戴住個喇叭去街, 但係佢都一樣咁開心吖! 有人話唔好出街, 又怕哩樣又怕嗰樣.....我都怕, 但係日日響屋企吽, 我驚JaJa有一日會拆屋呀! 最多出街小心d, 返屋企又抺乾淨d囉!

Oct 2

今日迎月, 當然要同爸爸媽媽食dinner過節啦! 爸爸帶JaJa去銅鑼灣接媽媽放工, 一齊去Times Square SML Dinner 之後仲行Times Square. 可惜, JaJa因為太想落地行, 吠爆Times Square, 唯有走人, 去咗188行咗陣就返屋企啦! 返屋企梳完毛, 覺得JaJa D 毛長咗好多吖!

傷口都埋得唔錯吖!

Oct 3

中秋佳節, 人月兩團圓吖! JaJa第一年過中秋, 太grandmother比咗封燈籠利是 (但係爸爸媽媽無吖!), 又有狗狗月餅食, 仲食咗好多過節雞雞呀! 食完飯仲去街街散步睇人玩tim!

JaJa 有個螢光燈籠

仲有螢光圈戴呀!

睇吓JaJa 幾咁開心!!!

Oct 4

今日又要悶局閉關響屋企修練啦! 因為JaJa尋日玩到好攰, 要休息啦! 所以跟爸爸媽媽響屋企吽臭啦! 回想上個禮拜佢個痛苦樣, 原來狗狗真係recover得好快架!

Oct 5

今日爸爸媽媽兩個都要返工呀! JaJa終於可以享受一個人o既寧靜. 今日仲係婆婆生日, 所以夜晚又跟爸爸媽媽出街街一家人食飯呀! 為咗令JaJa唔好食食吓飯嘈, 仲有骨骨比佢響袋袋咬, JaJa好乖乖吖! 今日發覺原來JaJa剩係鍾意坐車頭, 今日無媽媽一齊坐車車出去, JaJa跟住婆婆坐後座, 成日走黎走去想去車頭坐. 我諗JaJa覺得車頭係佢個私家位呀!

Oct 6, 7, 8, 9

因為爸爸媽媽日日返工, 所以一切如常, 係咁易出咗兩晚街跑跑, 照常食野, 食零食, 響屋企喪跑.....星期六拆線啦! 哩幾日剩係日頭同瞓覺戴喇叭, 其餘時間自由, 所以JaJa心情都唔錯.